Forsíða

Minningarsjóður Margrétar Oddsdóttur var stofnaður á fæðingardegi hennar 3. október 2010 en þá hefði Margrét orðið 55 ára. Að undirbúningi stofnunar sjóðsins stóðu fulltrúar lækna og hjúkrunarfræðinga sem annast skurðmeðferð brjóstakrabbameins, fulltrúar Bætum ein-stök brjóst og ættingjar Margrétar. Sjóðnum er ætlað að styrkja skurðlækningar við brjóstakrabbameini á Landspítala. Skipulagsskrá (pdf)

Lífslíkur kvenna með brjóstakrabbamein hafa batnað mikið á síðustu áratugum. Vegna þess hve lífslíkur eru góðar er vaxandi áhersla lögð á lífsgæði krabbeinsgreindra kvenna, m.a. með endursköpunaraðgerðum. Skurðmeðferð hefur því orðið umfangsmeiri þar sem oft fer saman aðgerð til lækningar á krabbameini og aðgerð til þess að leiðrétta það lýti sem krabbameinsaðgerðin veldur. Ör þróun innan þessa sviðs kallar á meiri og betri aðstöðu fyrir bæði sjúklinga og þá sem annast meðferðina.

Hlutverk minningarsjóðsins er að styrkja þessa starfsemi, m.a. með því að

bæta tækjakost sem notaður er við skurðmeðferð brjóstakrabbameins
bæta aðstöðu sjúklinga sem eru til meðferðar
auka þekkingu starfsfólks sem annast sjúklinga í meðferð
efla skráningu og gæðaeftirlit meðferðar

Fjáröflun sjóðsins felst m.a. í sölu bæði minningar- og afmæliskorta sem hægt er að nálgast hér á vefnum. Eftir að skráningarformið hefur verið fyllt út er greitt fyrir með greiðslukorti. Einnig er hægt að fá kortin á Ísafirði hjá Heilbrigðisstofnun Vestfjarða, bókaverslun Eymundsson og Birki ehf. en auk þess hjá foreldrum Margrétar, þeim Oddi og Magdalenu, að Seljalandsvegi 38 á Ísafirði.